თანამედროვე ხელოვნების სივრცე იოსებ ჯორბენაძის მეორე პერსონალურ გამოფენას, სახელწოდებით „TNT“, 21-25 სექტემბერს უმასპინძლებს.

ექსპოზიცია მხატვრის შემოქმედებითი გზის სხვადასხვა ეტაპს აერთიანებს და მის წარსულ გამოცდილებას, დღევანდელ ხედვასა და ახალ ვიზუალურ ძიებებს აერთიანებს.

გამოფენის მთავარი კონცეფცია აფეთქებაა, რომელიც ძალის, ენერგიის, ემოციის, სიყვარულისა და შემოქმედებითი იმპულსის სიმბოლოდ არის წარმოდგენილი.

ექსპოზიციაზე სხვადასხვა პერიოდის ნამუშევრები იქნება წარმოდგენილი, მათ შორის პარიზის გამოფენაზე ნაჩვენები სამი ნამუშევარი, რელიგიური თემატიკის ორი ხის კონსტრუქციული ტილო და ახალი ნამუშევრები, რომლებიც რკინისა და ხის განსხვავებულ ფაქტურებს აერთიანებს.

„TNT“-ის ერთ-ერთი მთავარი ნაწილი ცოცხალი პერფორმანსი იქნება. მხატვარი ახალ ნამუშევარს უშუალოდ მაყურებლის წინაშე შექმნის, რაც დამთვალიერებელს არა მხოლოდ საბოლოო შედეგის, არამედ თავად შემოქმედებითი პროცესის მონაწილეს და დამკვირვებელს გახდის.

„TNT“ არის აფეთქება, რომელიც დაგროვილ გამოცდილებას ახალ ფორმად გარდაქმნის.